ഫെബ്രുവരി അഞ്ചാം തിയതി ആരംഭിക്കുന്ന ഓട്ടോ എക്‌സ്‌പോയിൽ പുത്തൻ റ്റ്യുസോൺ വില്പനക്കെത്തുമെന്ന് ഹ്യൂണ്ടായ് ഇന്ത്യ എംഡി സീയോൻ സീയോബ് കിം ..
2018-ലെ ന്യൂയോർക്ക് ഓട്ടോ ഷോയിലാണ് ദക്ഷിണ കൊറിയൻ വാഹന നിർമാതാക്കളായ ഹ്യൂണ്ടായ് റ്റ്യുസോൺ എസ്യുവിയുടെ മുഖം മിനുക്കിയ അവതാരത്തെ ആഗോള വിപണിക്കായി അവതരിപ്പിച്ചത്. കഴിഞ്ഞ വർഷം പരിഷ്കരിച്ച റ്റ്യുസോൺ ഇന്ത്യയിലുമെത്തും എന്നായിരുന്നു പ്രതീക്ഷിച്ചിരുന്നത് എങ്കിലും അതുണ്ടായില്ല. എന്നും കരുതി വില്പനക്കുറവുള്ള റ്റ്യുസോനിണെ ഹ്യൂണ്ടായ് കൈവിട്ടിട്ടില്ല. ..

ഇപ്പോൾ വിപണിയിലുള്ള മൂന്നാം തലമുറ റ്റ്യുസോൺ എസ്യുവിയുടെ പരിഷ്കരിച്ച മോഡലിന്റെ എക്സ്റ്റീരിയർ ഡിസൈനിൽ ഹ്യൂണ്ടായ് കാര്യമായി കൈവച്ചിട്ടില്ല. അതെ സമയം കാലാനുസൃതമായ ചില മാറ്റങ്ങൾ കൂട്ടിച്ചേർത്ത കൂടുതൽ മനോഹരമാക്കിയിട്ടുമുണ്ട്. ഇതിൽ പ്രധാനം പുതിയ കാസ്കെഡിങ് ഗ്രിൽ ആണ്. ക്രോമിന്റെ ധാരാളിത്തമുള്ള ഗ്രിൽ പുതിയ തലമുറ ഹ്യൂണ്ടായ് വാഹനങ്ങളുടെ മുഖമുദ്രയാണ്. ഇപ്പോഴുള്ള മോഡലിന്റെ 3 സ്ലാറ്റിന് പകരം 4 സ്ലാറ്റ് ഗ്രിൽ ആണ് പുത്തൻ മോഡലിൽ. ഷാർപ്പായ ഹെഡ്ലൈറ്റുകളും അതോടൊപ്പമുള്ള എൽ-ആകൃതിയിലുള്ള എൽഇഡി ഡേടൈം റണ്ണിംഗ് ലാമ്പുകൾ, പുതിയ ഫോഗ് ലാമ്പ് ഹൗസിങ് എന്നിവയാണ് മുന്കാഴ്ചയിലെ മറ്റുള്ള ആകർഷണങ്ങൾ.

പുതിയ ഡിസൈനിലുള്ള ഡയമണ്ട് കട്ട് അലോയ് വീലുകൾ ഒഴികെ ഹ്യൂണ്ടായ് എസ്‌യുവിയുടെ സൈഡ് പ്രൊഫൈലിൽ മാറ്റമില്ല. പിൻഭാഗത്ത് റെയിൽ ലൈറ്റിന്റെ ഡിസൈനിൽ ചെറിയ മാറ്റങ്ങൾ വരുത്തി കൂടുതൽ‌ ആകർഷണീയമാക്കിയിട്ടുണ്ട്. ബമ്പറിൽ നിന്ന് റിഫ്ലക്ടറുകൾ ടെയിൽ‌ഗേറ്റിലേക്ക് നീങ്ങിയതാണ് മറ്റൊരു വ്യത്യാസം.

ഇന്റീരിയറിന് കാര്യവുമായി മാറ്റം വരുത്തിയിട്ടുണ്ട്. പരിഷ്ക്കരിച്ച ഡാഷ്ബോർഡിന് നടുവിലായുള്ള ഫ്ലോട്ടിംഗ് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം ശ്രദ്ധിക്കാതെ പോകുകയില്ല. ഈ ഇന്ഫോടെയ്ന്മെന്റ് സിസ്റ്റത്തിന് താഴേക്കായി എസി വെന്റുകൾ പുനഃക്രമീകരിച്ചിട്ടുണ്ട്. ഡ്യുവൽ ടോൺ ഇന്റീരിയർ തീമിന് മാറ്റമില്ലെങ്കിലും പുതുക്കിയ ഇൻസ്ട്രുമെന്റ് ക്ലസ്റ്റർ, പുത്തൻ ലെതർ സീറ്റുകൾ എന്നിവ പുതുമ നൽകുന്നു.
രണ്ടാം നിര യാത്രക്കാർക്ക് യുഎസ്ബി ചാർജിംഗ്, വയർലെസ് ചാർജിംഗ്, പനോരമിക് സൺറൂഫ്, ഫോർവേഡ് കൊളിഷൻ അവോയ്ഡൻസ് അസിസ്റ്റ്, ലെയ്ൻ കീപ്പിംഗ് അസിസ്റ്റ്, അഡാപ്റ്റീവ് ക്രൂയിസ് കൺട്രോൾ എന്നിങ്ങനെ ഫീച്ചർ സമൃദ്ധവുമാവും പുത്തൻ റ്റ്യുസോൺ.

ബിഎസ്6 മലീനീകരണ നിയന്ത്രണ മാനദണ്ഡങ്ങൾ പാലിക്കും വിധം പരിഷ്ക്കരിച്ച 2.0-ലിറ്റർ പെട്രോൾ, ഡീസൽ എഞ്ചിനുകളായിരിക്കും പുത്തൻ റ്റ്യുസോണിന്. പെട്രോൾ എൻജിൻ 155 എച്ച്പി പവറും 192 എൻഎം ടോർക്കും ഉത്പാദിപ്പിക്കുമ്പോൾ ഡീസൽ എൻജിൻ 185 എച്ച്പി പവറും 400 എൻഎം ടോർക്കും നിർമിക്കും. 6-സ്പീഡ് മാന്വൽ, 6-സ്പീഡ് ഓട്ടോമാറ്റിക് എന്നിവയാണ് ട്രാൻസ്മിഷൻ ഓപ്ഷനുകൾ.

ഹ്യൂണ്ടായ് റ്റ്യുസോണിന്റെ വില ഇപ്പോൾ 18.76 ലക്ഷം മുതൽ 27 ലക്ഷം വരെയാണ് (എക്‌സ്‌ഷോറൂം). ഏകദേശം 50,000 മുതൽ 100,000 വരെ വില പുത്തൻ റ്റ്യുസോൺ വേരിയന്റുകളുടെ വില വർദ്ധിക്കും എന്നാണ് പ്രതീക്ഷിക്കുന്നത്. അങ്ങനെയെങ്കിൽ സെഗ്മെന്റിൽ ഏറ്റവും വില്പനയുള്ള മോഡലുകളിലൊന്നായ ജീപ്പ് കോമ്പസ്സിന് ശക്തമായ വെല്ലുവിളിയാകും പുത്തൻ റ്റ്യുസോൺ. ഫോക്സ്‌വാഗൺ ടിഗുവാൻ, ഹോണ്ട സിആർ-വി എന്നിവയാണ് മറ്റുള്ള എതിരാളികൾ